Palazzo Altan

Al è stât edificât tal ‘600 in borc Talian dulà che, intal 1603, la famee e veve cjolt un edifici. Daspò il complès architetonic al è stât definît di modifichis sucessivis, dal acuist dai Cesarini della Torre Grimana intal 1751 e de costruzion dal oratori dedicât a Sant Gaetan. Fin al ‘700 il zardin di Palaç Altan al jere definît cortîf, delimitât des dôs barcjessis des dôs bandis e da pît di un mûr di forme semicircolâr cun rescj di afrescs atribuîts a un pitôr todesc dal secul XVII. Cul zovin Indrì Altan, che al faseve part de colonie arcadiche di Udin, al deventà sede di riunions academichis. Une situazion cussì culte e rafinade e puartà dal sigûr a modifichis sostanziâls intal implant origjinâl, modifichis che si puedin viodi cun facilitât inte plante dal palaç, e des pertinencis, intun libri catastic dai bens dai Altan dal 1771. E fo zontade une struture simetriche ordenade che e partive dal as di ingrès, dant cussì une impuartance notevule al emicicli des muris; daspò di chest, al è facil che la aree che te plante e ven clamade ort e fos destinade a zardin. I strops a jerin di fat disegnâts in maniere elegante, dividûts in cuatri grups separâts dal implant a crôs dai stradoncins. Vuê cheste aree no si pues plui viodile, ristuturade in grande part come parc; il zardin denant de vile al è stât modificât intai agns vincj ancje te sielte des speciis e de colocazion di variis statuis cumò ruvinadis. Par podê gjoldi di gnûf il splaç vert in dute la sô bielece e integritât si spiete un gnûf restaur, di fâ in maniere contestuâl ancje cun chel dal edifici.