Cose

Tai Monumenta historica ducatus Karinthiae di von Jaksch si nomene pe prime volte un sâr di Cose, Wolftrigel, che al jere de cort dal patriarcje di Aquilee Pelegrin di Pao. Salacor al jere de stesse famee che intes epochis daspò si le clamarà cul predicât di Spilimberc. Il borc al cjape il non de aghe che e ven jù di Travês. Parmìs si cjate il palaç incjistielât dal Sîscent, fat sù dai conts di Spilimberc e daspò, forsi par vie di gnocis, passât ai conts di Atimis Manià. Vadì nassût sui rudinaçs di une fuartece medievâl che e jere prime, il palaç al patì une vore di dams vie pe prime vuere mondiâl. Si pues cognossi la fisionomie origjinâl in gracie di cualchi foto antighe conservade intal archivi fotografic dai Museus Civics di Udin, scatade pôc dopo dal fûc che lu fiscà e che daspò al obleà a butâ jù une part de struture: la costruzion e je imponente, di forme retangolâr e sierade di cuatri toratis cuadradis metudis di cjanton, cul denant inzentilît di un templâr e di une scjalinade dople che lu à fat deventâ ancjemò plui maestôs.