Azienda Vitivinicola Franco Furlan

Il paisut di Cose al à cualchi ostarie e une tratorie “Alla Baita di Castelcosa” là che si pues cerçâ un mangjâ tipic furlan otim. Se si decît di fermâsi pe gnot, i proprietaris de aziende a metin a disposizion i locâi de forestarie dal cjistiel, là che a son stadis gjavadis fûr trê cjamaris matrimoniâls cun bagn.
Se si vuelin locâi plui grancj si à di cirî a Spilimberc o a Voleson. Par rivâ a Cose al è ancje un servizi public di corieris.
La Aziende Vitivinicule “Franco Furlan” e à sît tal antîc Cjistiel di Cose, cualchi chilometri lontan di Spilimberc, tal cûr gjeografic dal Friûl. La aziende e je li dal 1978 e di in chê volte a son nassûts i vins cu la marcje “Castelcosa”.
I vins fats de aziende a son vins di taule e no vins D.O.C. par vie che si vûl dâ impuartance al prodot e no ae zone di produzion, che e garantìs dome lis uis di dulà che al saltarà fûr il vin, ma no la sô cualitât.
La Aziende e ponte duncje a fâ un prodot che al puedi competi ancje a nivel internazionâl; di fat a son agns che e espuarte su tancj marcjâts forescj cuntun bon sucès.
Pe produzion la aziende e à sù par jù un miâr di etolitris di capacitât in botis di len, par rivâ a tignî vins blancs e neris che par ciertis carateristichis di “nassite” a vedin un benefici grues intal fâsi li dentri. Cun di plui, il complès al à une cjanive cun vassiei di açâr inox e di fibris di veri (vitroresine) par tignî il vin e une sale moderne e ben dotade par imbutiliâ.
In gjenerâl, la ricercje e i sfuarçs de Aziende “Furlan” a son indreçâts a vê vins che in bocje a sedin inmò plui gustôs che no a nasâju e che in ogni câs a vedin chês carateristichis di plenece, taronditât e persistence di sodisfâ in dut e par dut i clients.