Spesse

La struture architetoniche atuâl dal cjistiel di Spesse di Caprive e je stade prontade daûr dal progjet dal architet triestin Ruggero Berlam che, sul tacâ dal Nûfcent, al intervignì suntun edifici plui antîc, operant daûr dai mûts de architeture neogotiche, cu la torate a curmei rindude bugnade e realizade cui incalms carateristics, e cu la bifore centrâl cerclade dal arcut di piere policrome, anetude al cuarp di fabriche coronât di cordui insiorâts. Salacor, l'edifici di prime al jere nassût sui rescj di un antîc sît di avistament che forsi al esisteve za in ete romane e che al fo doprât ancje dai langobarts, par vie de posizion strategjiche dal lûc. Imprin dai nobii Rassauer, al passà daspò ai Torians Valsassina che a derin acet, tal 1773, a Giacomo Casanova. Dut ce che al reste de struture antighe, tal cjistiel dal dì di vuê, al è cualchi rest di mûr de bande a soreli a mont dal edifici, in plui des cjanivis che a forin sgjavadis intal cret e che ancjemò vuê a son restadis compagnis.