Salis, Spessa

La piçule localitât là che al è il cjistiel e à dome il ristorant La tavernetta logât da pît de culine là che sore al è il cjistiel. A Caprive al è cualchi bar; par albiercs e par altris ristorants si à di lâ a Cormòns. Te piçule frazion di Spesse si rive di Caprive cuntune coriere su prenotazion.
Il salon (12x8x3.5) al è tal cuarp centrâl dal edifici. Al à il riscjaldament e trê jentradis indiretis (a norme) passant par altris ambients. No son altris scjalis ni jessudis di sigurece.
L’ambient si presente avonde fin cui parchets a spine di pes, parêts decoradis e furnidis cun grancj spiei. Une cuadrifore elegante vierte bande soreli a mont de sale, un grant lampadari di veri di Muran e altris lampadis coordenadis a dan lûs ae sale. Al è un taulin par relatôrs. La sale e ten 70 puescj di sentâts, la capience e rive a 90 personis. No je la pussibilitât di scurîle. Dongje a son i servizis, cul riscjaldament e a norme. La sale e je a disposizion dut l’an.
Altris trê ambients li dongje: doi tinei (8x5x3.5)  e une sale par gustâ (10x7x3.5), ducj a  norme e cul riscjaldament. I prins doi a tegnin 20 personis ognidun, la sale 40.