Strassolt Disot

Al cjistiel disot si rive passant pal carateristic portel dal Sîscent cu la piche di cuet, che al introdûs al piçul ziron e che al cjape dentri cualchi rustic e la gleseute di Sant Marc, salacor fate sù rangjant une torate scudade, che a partissin dal turion antîc, slargjât daspò, cu la façade viers il zardin inzentilide intai prins decenis dal Sietcent daûr i guscj di chê volte. Par dentri a son salis cun preziôs sufits di len piturâts che a rimontin al tart Cinccent e, al plantiere, la cusine viere e l'antîc cuarp di vuardie, che il restaur al à permetût il recupar de lôr fisionomie medievâl origjinâl. Al è une vore sugjestîf il grant parc dal Sietcent, introdusût di dôs pescjeris e siôr di statuis e di speciis raris e antighis. Fûr dal zironut si slargje il "borc gnûf" fin ae puarte Cisis, salacor nassût tal secul XIII. Une altre presince notevule e je chê de gleseute medievâl di Sante Marie "in vineis", logade fûr de cente des muris, che e conserve par dentri un cicli a fresc dal Tresinte tra i plui impuartants dal Friûl.