Giardino di Strassoldo di Sotto

Il parc dal Cjistiel di Sot al è un dai plui interessants in Friûl sedi pal so stât di conservazion esemplâr sedi parcè che  al è testemoni dal inizi de difusion dal zardin paisagjistic inte zone. Al è stât achì di fat che tal Sietcent i elements formâi dal zardin a son stâts metûts in relazion cu la nature. Chescj intervents cussì inovatîfs intal cjamp botanic a son dovûts ae famee dai Strassolts – che e proviodè ae bonifiche de paludere pustote, za doprade come element di difese des struturis dal cjistiel – e in particolâr a un so component, Nicolau Francesc (1701-1779), che tal secul XVIII al tramudà chest sît, fasintlu deventâ fertil e dantji un notevul atrat. Ancjemò in dì di vuê si pues viodi su la façade dal Cjistiel une lapide di laut ae ativitât dal cont. Inte part che in origjin e jere ocupade di piçui boscs e risultivis al cjatà duncje sistemazion un implant dulà che la aghe e deventà l’element artistic principâl: fontanis, poçs, sfueis e zonis di pescje a fasevin di spieli naturâl aes statuis dal Sietcent e aes speciis cualchi volte ancje raris. Di fate particolâr e je dal sigûr la isule retangolâr che si cjate al limit estrem dal parc; delimitade intal so perimetri di un fossâl, e tignive un zardin talian in miniature, cun viâi  perpendicolârs incrosâts intal centri intun splaç circolâr e un piçul viâl perimetrâl, decorât di plantis di bos (che si puedin ancjemò viodi) e simpriverts. I spazis cussì dividûts a viodin vuê une vivarose vegjetazion: a son une plante di bos, intal Sietcent cun forme di bale, ma di cetant timp lassade cressi a forme libare, e arbussits preseâts di garofui antîcs che a fasin ancjemò vuê di chest lûc un zoiel naturâl coronât des aghis. Dongje di cualchi specie interessante par raritât o veglece si ‘nt cjatin altris tipichis dai zardins locâi: cjastinârs mats e cjarpins che a segnin i tiermins la aree, olnârs, bedois, faiârs, agaciis intune zone tignude a bosc sul limit dal parc.