Sofumberc

Salacor fortificât za in ete tarde antighe e forsi doprât dai Langobarts, tal timp dai Sassons al fo dal sigûr sede di une capele. Tal an 1025 al risulte domini dal patriarcje, che salacor i partignive za di prime. Tal 1184 il cjistiel al è abitât di Matie e Varient di Sofumberc, vassai de Glesie di Aquilee. "Sicu lûc cetant ridint", tal 1298 il cjistiel al fo sielzût dal patriarcje Raimont Torian "tant che albierc dal Princip e de Cort". Dut câs i antîcs feudataris a conservarin il dirit di abitance e cetantis voltis ur forin confermadis lis investiduris, tant che tal secul XIV i siôrs di Sofumberc a gjoldevin di grande protezion patriarcjâl. Daspò "contesis tant grandis" cui Torians, che dal 1313 "a vevin puest" tal cjistiel, e cui patriarcjis, Indrì di Sofumberc al fo justiziât ai 24 di Mai dal 1352. Parâts fûr i Sofumberc, il cjistiel al fo par une vore di timp sot di un cjapitani patriarcjâl. Teatri di cetantis vicendis leadis ae permanence dai patriarcjis in chê sede, al somee che il cjistiel di Sofumberc al sedi stât sdrumât par vie de ocupazion veneziane dal Friûl.