Sant Zuan dal Landri

La capele di Sant Zuan dal Landri, opare avonde insolite tal specific de architeture fortificade furlane, plui che un cjistiel vêr e propri e je une glesie fortificade. Fate sù intes formis atuâls ae fin dal secul XV, a mieze cueste suntune alte parêt di cret a plomp sul Nadison, in posizion pardabon inacessibile, si cjate su la jentrade di un landri, doprât fin par antîc tant che ripâr pe int dal lûc. Il landri, cjapât dentri tra chês fortificazions romanis metudis sul confin de X regio, po dopo sede di un stanziament militâr langobart, al fo consacrât al cult almancul dal secul otâf e al è documentât  intune epigrafe dal tacâ dal secul X, di indulà che o savìn de sapulture in chel lûc di un ciert Feliç, vadì il diacun che Berengari I, tal Març dal 888, i concedè l'ûs de capele di Sant Zuan dal Landri; cheste e veve dal sigûr di jessi une des oparis fortificadis che a cjapavin dentri il cjistiel dal Landri, aromai sparît, logât a une cuote a pene plui basse, che si conserve la sô memorie in cetancj scrits.