Paulâr

I Cjaliç, nobii tumiezins e barons dal Sacri Roman Imperi, si postarin inte val di Incjaroi inte seconde metât dal Cinccent, salacor mandâts de Serenissime par sorestâ al sfrutament des risorsis dai boscs. Il complès fortificât, che za al esisteve in ete medievâl, di li che si viodevin lis postazions di Praduline e Duron par controlâ la val, in origjin al cjapave dentri une gruesse torate cun in bande cjasaments minôrs e une cente murade. L'aspiet dal dì di vuê al ven di Jacum Cjaliç che al ristruturà il complès in doi viaçs: tal 1690 al slargjà la ale nord cjapant dentri la torate antighe e tal 1730 al metè man a la ale a soreli a mont, tirantle sù su struturis plui antighis che ancjemò si pues ricognossilis in cualchi ambient. Il grant complès, articolât in trê alis, al conserve dentri bielis decorazions a fresc dal Sîscent, stucs policroms e furniments preseabii dai secui XVI e XVII. A son une vore sugjestîfs la "Sale dai ritrats", lis dôs grandis cusinis, l'antîc cuarp di vuardie cul biel camin di marmul, la biblioteche cetant indotade cul archivi e il "negozi" dal Votcent indulà che si vendevin i prodots des aziendis de famee.