Palme

Il 7 di Otubar dal 1593, aromai pierdude la place fuarte impuartante di Gardiscje, te dì dal XXII aniversari de bataie di Lepant, al fo firmât tal cjistiel di Strassolt li dongje l'at di fondazion de fuartece di Palme. A firmâ il document e a inviâ il progjet a forin i senatôrs venezians Marc'Antonio Barbaro, Jacopo Foscarini, Zaccaria Contarini, Marino Grimani e Leonardo Donà, judâts dal anzian Juli Savorgnan. Palme, fuartece a nûf pontis, cenglade di bastions fuartonons e di fossâi larcs, si pues tignîle tant che un fortunât esercizi tal meti in vore chel che al jere stât esprimût dai tratâts  rinassimentâi in mert aes tematichis de citât ideâl, e par chest pont strategjic pe difese dal teritori de Serenissime cuintri la agression imperiâl e turche a soreli jevât. Dividude in nûf baluarts (Grimani, Savorgnan, Foscarini, Villachiara, Contarini, Garzoni, Mont, Donato e Barbaro), la citât, tornade a batiâ di Napoleon "Palme la Gnove", e je un poligon di 18 lâts che si rivii passant par trê puartis (Aquilee, Udin e Cividât) progjetadis di Antonio Scamozzi tra il 1598 e il 1605.