Civico Museo Storico

Il Civic Museu Storic al met dongje un ciert numar di testemoneancis, in origjinâl o in riproduzion, che a documentin la nassite e il svilup de Fuartece di Palme dal periodi venezian ae prime vuere mondiâl. Il percors al scomence al plan tiere dulà che a son in esposizion cjartis storichis: une dal secul XVIII che e ilustre i possediments venezians e arciducâi; une dal periodi venezian e une altre di chel austriac cu la evoluzion des trê centis fortificadis de Fuartece. Intes vitrinis si puedin viodi une vore di armis e di armaduris antighis che i partegnin al Museu Nazionâl di Castel Santangelo a Rome (in dipuesit conservatîf dai agns setante) e coracis cun elms che a vegnin de ete de fondazion de Fuartece di Palme (secui XVI-XVII). La esposizion des armaduris e va indenant tal plan disore. Daspò e ven une serie di documents, medaiis di metai diferents, disens, manifescj, riproduzions di plantis (a ‘nd è che a vegnin dal Archivi di Stât di Vignesie, dal Museu Correr e de Biblioteche Marciane) dividûts intai cinc periodis fondamentâi de storie di Palme: chel venezian (1593-1797), chel napoleonic (1797-1798; 1805-1814), chel austriac (1814-1866), la insurezion dal 1848, la anession al ream di Italie (1866), la prime vuere mondiâl. Tal mieç de sale a son dôs cassefuartis dal secul XVII. Une di chestis, che e à sedis combinazions par vierzile, e je considerade tant che un preseât lavôr di artesan comissionât de Cjamare des Financis.