Osôf

"Osôf Cjistiel e Fuartece, logade parsore di un cuel, intune campagne sul Tiliment sot des monts, ma tant lontan di chês che no si pues batilu di nissune bande", cussì Jaroni di Purcie al descriveve la fuartece tal 1567. Antîc insediament celtic, daspò oppidum roman, Osôf al è documentât tor dal an 550 di Venanzi Fortunât: "Per rupes Osope tuas quo lambitur undis". O savìn di Pauli Diacun che tal 610 i Avars, vinçude la resistence dal duche Gjisulf, a assediavin la fuartece. Botinât e fiscât dai Ongjars tal 902, il cjistiel al fo regalât tal 1094 ae Badie di Siest. Concedût tal 1255, sicu feut di abitance, a Coni di Osôf di bande dal patriarcje Gregori di Montelongo, ai 25 di Lui dal 1328 il cjistiel al passe, par volontât dal  patriarcje Paian Torian, a Fidrì di Savorgnan, dal ram che di culì si clamà "de Mont". La fuartece e deventà un pont nevralgjic de difese dal stât di tiere e e fo difindude in mût valorôs di Jaroni Savorgnan tal 1514. Ocupade dai francês tal 1797, e je ancjemò protagoniste di impuartants fats di armis tra il 1809 e il 1814, e tal 1848.