Gronumberc

Il sît al de acet fin de ete romane a une specule che e vuardeave la val dal Nadison, su la strade che e menave a Forum Iulii (Cividât), e al mantignì la stesse funzion di control ancje intes epochis seguitivis. Feut dai sovrans omonims dal 1276, al passà daspò ai nobii cividins de' Portis, che lu  tignirin fintremai al 1401, cuant che, par vie femenine, al fo ereditât dai nobii Formentins. Tal 1776 al fo comprât dai Remondins, famose famee di stampadôrs di Bassan, che lu tignirin cuasi par un secul. Cundut che al sedi stât bandonât e che al sedi lât in degrât sul tacâ dal secul passât, i rescj dal cjistiel si alcin ancjemò maestôs su la cueste di Puriessin, cjapâts dentri intun ambient naturâl morbit, siôr di bielece e di sugjestion. A son cetant interessants il fossâl sgjavât intal cret che al protezeve la jentrade e lis muris dal perimetri, cun paraments esternis di pieris scuadradis disgresadis cun cure e incalmadis tra di lôr, che insom, in cualchi pont, si viodin ancjemò olmis dai curmei.