Glemone

Dal sigûr za popolade par antîc, Glemone e fo sît di arimanie in ete langobarde e in cheste vieste e je ricuardade tal 611. Nomenade intun document di Oton III dal 1001, tacant dal secul XII la citadele si disvilupà svelte da pît dal cjistiel, in gracie ancje de posizion cetant interessante pai cumierçs e pai rapuarts cui paîs nordics. Dilunc la storie, Glemone e patì cetancj assalts e si cjatà  plui voltis tal mieç di impresis di vuere impuartantis, massime cuintri Vençon, citadele rivâl a pene dongje. Cul taramot dal 1511 il cjistiel al colà e cuntune part des sôs pieris al fo fat sù il gnûf palaç comunâl. Come dute la citadele, la fuartece (culì intune fotografie sul tacâ dal Nûfcent) e patì dams cetant grâfs par vie dai taramots dal 1976. In plui dal cjistiel, l'abitât al ufrìs une vore di monuments e testemoneancis di art di grant interès; fra chescj, il palaç de comunitât e il magnific domo medievâl, che su la sô façade a risaltin la maestose statue di Sant Cristoful e la biele "galarie de Epifanie".