Castello di Cergneu (Nimis)

Salacor fat sù sore di une difese romane plui antighe, tal 1170 il cjistiel al fo regalât di Volrì, marchês di Toscane, al patriarcje di Aquilee. Tal secul daspò, la jurisdizion e passà ai sovrans di Savorgnan: i fîs di Conrât, Detalm e Pieri, a cuistarin il predicât dal gnûf feut, che i zontaran, tal Cuatricent, chei di Breçà Disot e Disore. I rescj dal cjistiel a partegnin ancjemò ai dissendents di chê famee.

Za tal 1521 si dîs che la fuartece e veve patît dams: salacor al fo par colpe de vuere fra Vignesie e l’Imperi ma forsit ancje par vie dai disordins de joibe grasse dal 1511 e pal taramot di chel stes an. La posizion cetant adalt e la impuartance strategjiche aromai passade, a faserin che si lu abandonàs. Ai  rescj, ancjemò maestôs par vie de torate, dal torat e di une part de cortine, si rive passant pe stradele cjistielane antighe (cun olmis dal pedrât origjinâl) fûr pal bosc. Prime dal cjistiel, passât un biel puintut, si cjate la gleseute dai Sants Pieri e Pauli (in origjin Sante Marie Madalene), fondade tal 1323.