Madone di Mont

Salacor, il sît al fo abitât fin de ete romane massime par vie de posizion dominante e sigure, e forsi al de acet a un lûc di cult paleocristian fin dal cuint, sest secul. Nomenât pe prime volte intun document dal 1175, il santuari de Beade Vergjine di Mont al fo prime dal preposit di Sant Stiefin di Cividât, e daspò, dal 1253, dal cjapitul di Sante Marie. Za di chê epoche a tacarin grues lavôrs di slargjament ma un restaur radicâl al fo metût in vore dome partint dal 1469, dopo di un fûc disastrôs piât di un fulmin, e tal secul seguitîf, daspò dai fuarts taramots dal 1511 e 1513. Il complès, ancje se a son stâts tai ultins timps intervents pesants, massime daspò des distruzions patidis vie pe ultime vuere mondiâl e par permeti ai tancj fedêi di acedi, al manten il so aspiet di santuari fortificât, strent dentri de fuarte cente di muris, protezût di plui toratis e rinfuarcît tal 1647 daûr dal disen dal cividin Josef Cantinele, cun tal mieç la grande glesie e ator i edificis monastics e lis cjasis che a formin il borc.