Buri

Il cjistiel al è nomenât pe prime volte tal 1219, cuant che Jacum di Buri al deventà citadin di Trevîs, metintsi cuintri il patriarcje di Aquilee Bertolt; dut câs, za doi secui prime, e je documentade la esistence dal borc. Intun disen dal Cuatricent, la fuartece e je formade di muris indotadis di une torate de puarte e cuntune torate periferiche cul cuviert a spice. Pe sô posizion, ben difindude e di grande impuartance strategjiche pe vicinance cun Udin e Cividât, al fo cjapât cetantis voltis dentri in fats di armis e di sanc. Di fat, tal 1306, colât in man dal cont di Gurize pal tradiment di un dai siei sovrans, al è assediât des fuarcis dal patriarcje e dai siei aleâts, cjapât e sdrumât. Dome trê agns daspò al fo tornât a fâ sù. Passât ai nobii cividins de Portis, tai secui XVII e XVIII a forin puartâts indevant lavôrs impuartants, lâts dilunc tai secui daspò in gracie dai gnûfs proprietariis, i conts di Var e po i barons Morpurgo. Il complès, articolât e segnât di dôs toratis altis, al domine dal alt une largjure siore di vignâi.