Breçà Disore
Il cjistiel al è logât ae estremitât nord dal abitât di Breçà, tra lis localitâts di Pagnà e Morùs. Al rapresente un dai pôcs elements di architeture fortificade in Friûl che nol vedi patît modificazions o che nol sedi stât tornât a fâ sù dilunc i secui. Nomenât pe prime volte in documents dal secul XII, si pense che chest insediament al esistès za tal 983, cuant che l’imperadôr Oton II al confermave al patriarcje Rodoalt i famôs possediments di Udin, Braitan, Gruagn, Buie e Feagne. La cjasade di Breçà, tal XIII secul, si dopleà cu la costruzion di un altri cjistiel clamât di Breçà Disot, che cumò e reste dome une torate e la gleseute di Sant Andree. Tal 1309 al patì distruzions par man des miliziis di Rizzardo da Camino, cjapitani di Trevîs. La fuartece disore, pûr di dimensions modestis, e conserve lis carateristichis particolârs des plui antighis oparis difensivis furlanis. Logât suntun çuc che al parone par une largje trate i cueis dulintor, al à muris di bon spessôr, che a custodissin chê che i disin la "Cjase dal Cjapitani", restaurade di pôc. Parmìs lis muris setentrionâls, l'edifici de vuardie al pararès jessi dai secui XIII-XIV. Daûr di cualchi studiôs, Breçà al sarès il cjistiel di Braitan che si cjate inte donazion de bande dal imperadôr Oton II al patriarcje di Aquilee Rodoalt tal 983. Imprin feut de omonime famee, tacant dal Tresinte al deventà possediment di cetantis cjasadis. Tra chestis i siôrs di Savorgnan-Cergneu che tal secul daspò a otignirin dut il feut, cjapânt il predicât. Il cjistiel al è un esempli interessant di opare furnide, daûr dal scheme des plui antighis fuartecis furlanis, in pratiche interie almancul tes sôs liniis essenziâls; logade suntun çuc, e cjape dentri un circuit murât (un altri plui periferic al cercenave il borc) cu la possente torate mestre e la "cjase dal cjapitani", a vuê in restaur. Pôc disot si cjatin la gleseute cjistielane di Sant Lenart e la vile di Breçà Pirzio Biroli, fate sù daûr dal progjet di Provino Valle sui rescj dal edifici di prin, sdrumât vie pe prime vuere mondiâl e che a restin dome i rustics laterâi, cun dulintor un grant parc siôr di plantis raris e secolârs.
