Giardino di Brazzacco

Il grant parc dal cjistiel di Breçà, vuê dividût in dôs proprietâts, al fo la espression dal amôr pe nature che la sô creadore e pandè in chest lûc.
Cora Slocomb, femine ae fin dal Votcent di Detalmo di Breçà, e rivà in tiere furlane e tal zîr di cinc dîs si contornà di esperts par dâ vite a un spazi vert ispirât ai concets de planificazion dai zardins difondûts in Luisiane, tiere di origjin de intraprendente siore. Judade dai conseis sul zardinaç che a circolavin in famee, e fuarte des competencis tecnichis in materie, e disegnà jê in persone la fisionomie dal zardin che al varès vût di cjapâ la forme di un strafoi (simbul doprât di Cora par dutis lis sôs ativitâts e jenfri chestis ancje la famose scuele di picet).
Grancj prâts e fonts boschîfs, prins plans di altecis plui bassis, concentrazions di arbui alternadis a prâts inglês a caraterizin chest singolâr complès che, se pûr a prin intro al pâr spontani, al fo progjetât tai detais plui piçui. In mût savint varietâts locâls a forin, di fat, metudis dongje di plantis e cisis che lis lôr semencis, di divignince di altris continents, a vignivin puartâts tant che regâl ae nobildone. Tantis a son, duncje, lis speciis ca rapresentadis in diviersis varietâts: Cedrus libani, atlantica e deodora; Tilius europea e americana; Fagus pendula e purpurea, e v.i. La siore e pensà ancje al completament dal cjistiel storic e a zontâ un zardinut a ornament dal spazi jenfri la tor e la fortificazion perimetrâl.
Il parc al fo une sorprese ancje par Fey von Hassel che, maridade cun Detalmo Pirzio Biroli (nevôt di Cora), e le a stâ alì tal 1940, tal stes an che la creadore dal zardin e murì: “Breçà al è un puest favolôs. No ai mai viodût nuie dal gjenar (…). La cjase e je dute fodrade di garofui ros; al è un parc di sedis etars plen di arbui secolârs e cun prâts di fate inglese; lis plantis a son un miscliç di vegjetazion mediteranie e nordiche”.
I garofui no son citâts a câs parcè che jenfri lis preferencis botanichis di Cora a jentrin ancje chestis rosis tant bielis, stant che si inamorà di lôr cuant che, rivade a Breçà vie pal Invier, e fo smaraveade di cjatâ jenfri la nêf garofui sflorîts.
No bisugne però dismenteâ che, dongje de contesse di Breçà, al ve une buine notorietât ancje il fradi di Detalmo, Filippo, pes sôs violis çuetis che a deventarin cussì famosis di jessi domandadis a San Pietroburgo o fintremai in Sud Afriche.