Atimis

Nomenât pe prime volte tal 1106: "castrum jacet [...] ad locum qui dicitur Attems", il cjistiel disore al fo prin dai marchês di Moosburg, po di Bertolt vescul di Salisburc che daspò lu regalà ae gnece Matilde e a Volrì, marchês di Toscane. Tal 1170 il cjistiel al passà, cun chel di Partistagn li dongje, al patriarcje di Aquilee Vodalrì di Treffen. Daspò, chel al assegnà il feut ai fedêi vassai Arpon e Indrì, primarûi dai doi rams dai Attems. Fra il 1250 e il 1260 al fo fat sù il cjistiel disot e tal 1275, par man di Raimont Torian, al fo infeudât Artinît di Attems che però lu butà jù tal 1294. Tal 1377 i Attems a risultin di gnûf parons di ducj i doi i cjistiei, che si viôt che alore a vevin di jessi stâts tornâts a fâ sù. Daspò dal 1485, lis dôs fuartecis, bandonadis, a lerin al mancul vadì ancje par colpe des scorsizadis dai Uscocs. La distruzion definitive e fo tal 1511 a cause dal taramot. Ai rescj dal cjistiel disore (te fotografie) ur disin vuê “cjiscjeluts”. Di ricuart dal cjistiel disot, a son restâts i tocs dal antîc torat.