Museo della terra dei nove castelli

Il museu, ancje se metût intal centri di Atimis, al è intune posizion cuasi periferiche rispiet al abitât, contornât di un paisaç naturâl dulà che si viodin i rudinaçs des fuartecis locâls. Cuntun itinerari une vore ben costruît dal pont di viste didatic, si puedin lei i reperts cjatâts intai nûf cjistiei, aromai sdrumâts, de pedemontane orientâl dal Friûl par capî la culture e la vite cuotidiane intes fuartecis de Ete di Mieç. Tes undis sezions il public al ven puartât, cun tescj, reperts archeologjics, panei esplicatîfs, modei di struturis fortificadis, ricostruzions di internis, ae comprension dai elements fondamentâi de societât de Ete di Mieç: la evoluzion architetoniche dai edificis, la coniazion – un coni funzionant al permet ai visitadôrs di provâ in prime persone la opare di stampe des monedis-, la agriculture, la organizazion difensive e ducj chei aspiets de vite in cjase di ogni dì che i ogjets di ceramiche o di metal a puedin riclamâ. Al plan tiere si scomence cu la ricostruzion storiche dal archeolic e dal studiôs, par mieç di ogjets e testemoneancis scritis. In chestis cinc stanziis al è interessant cemût che e je stade prontade la tierce, clamade “sale dal otagon”: vot vetrinis verticâls a son metudis in cercli di mût che a somein colonis luminosis che a tegnin sù frontons cun arcs passants, sierant cussì il spazi intune sorte di torate otagonâl. Se chest plan al è caraterizât di une esposizion classiche dal repert, intal plan disore si puedin rimirâ ricostruzions di ambients internis complets, dulà che il visitadôr, cul jutori di lûs e suns, al è puartât a jentrâ in mût ideâl inte realtât de Ete di Mieç. Un puiûl di fier e di len, che al somee suspindût intal vueit, al simule un puint jevadôr e la grande vereade, cuasi un barcon sul timp e permet la vision dal paisaç ator ator, incontaminât des costruzions modernis e par cheste reson dongje de situazion ambientâl dai timps dai cjistiei considerâts te esposizion. Di vuardie tal ingrès des salis seguitivis al domine il Cavalîr di Sofumberc, une sagume prontade cuntune armadure antighe che al anticipe i ambients ricostruîts daspò e insiorâts di ogjets riprodusûts in mût sientific.