Darcjan

Il cjistiel di Darcjan Disore al jere in origjin dongje de gleseute di Sant Maur, sul ôr dal Cuar, fat sù su lis maseriis di une vile rustiche romane. Intune epoche no ben individuade al fo tornât a fâ sù tal sît che al è cumò, plui sigûr dal pont di viste strategjic, e slargjât salacor viers la fin dal secul XIII; un altri cjistiel al jere a Darcjan Disot, butât jù tal secul XV vie pes scorizadis dai turcs. Dal sigûr, almancul dal secul XII a jerin a stâ i Tricjans (cussì, fin al Cinccent e fo clamade la famee feudatarie, pai trê cjans  neris dal steme), marescalcs e puartebandieris ereditaris dal patriarcjât di Aquilee. No cate la pierdite de torate, çoncjade salacor ae fin dal secul XVI, il cjistiel al manten la sô sugjestive fisionomie medievâl, cu lis cortinis cui curmei vuelfs, la carateristiche dople torate de puarte e il torat possent (tra i plui grancj dal Friûl) cun insom une elegante rie di biforis tardis romanichis; dentri si cjatin une salute frescjade di Andrea Urbani e une schirie di salis cun camins e portâi in marmui policromis, opare dal lapicide dal Sîscent Raffaello de' Raffaelli.