Aquilee e fo fondade tal 181 p. di C., par volontât dal senât roman, par protezi il confin nordorientâl dal Imperi menaçât dai barbars. Deventade capitâl de decime regjon Venetia et Histria, e patì violencis e vuascj dilunc lis vueris civîls che a vevin cruziât l’Imperi de muart di Neron fintremai che al cjapâ il podê Vespasian (68-70 d.C.). E fo assediade tal 169 d.C. dai Cuâts e dai Marcomans, che in ogni mût no rivarin a concuistâle, e po, dibant, tal 361 di Julian l'Apostate che al veve declarât vuere al imperadôr Costanzi. Tal 452 e fo devastade di Atile e tal 568 e fo cjapade e governade dai Langobarts, che a vevin fissât la lôr sede a Forum Iulii (Cividât). Cuntun at dal 3 di Avrîl dal 1077, l'imperadôr Indrì IV i tribuì al patriarcje Siart il titul di cont dal Friûl, rindint autonome
la Glesie
di Aquilee dal Ducât di Carinzie e dantji il podê temporâl su dut il Friûl e su larcs teritoris confinants. Il Patriarcje al deventà cussì duche dal Friûl e marchês de Istrie e dal Cragn. Al nassè cussì un stât che al mantignì la sô indipendence fintremai al 1420, cuant che al fo anetût cu la fuarce ae Republiche di Vignesie. Dopo di chê date
la Glesie
di Aquilee e mantignì la sovranitât su cualchi localitât dal Friûl, fin cuant che, tal 1751, pape Benedet XIV al abulì il Patriarcjât in acuardi cui Asburcs e cu
la Republiche
di Vignesie, e al costituì tal so puest lis dôs Arcidiocesis di Gurize e di Udin. Lûc siôr di stratificazions storichis e monumentâls, Aquilee e reste di grande impuartance pai siei reperts di epoche romane: il forum, lis muris, la vie Sacre cui rescj dal puart fluviâl sul cors antîc de Natisse, larcs tocs di stradis lastradis di piere e ancje un numar infinît di pieris tombâls, sarcofacs, furniments, metopis, capitei, tombis, paviments musîfs e v.i. Ancje il complès monumentâl de basiliche, di epoche patriarcjâl, al è di grant interès, cu la torate antighe, cumò cjampanili, e il batisteri. E fo citât murade in ete romane e medievâl; a son stadis cjatadis olmis impuartantis des muris e a restin lis fondis des toratis, in plui dal cjampanili fat sù dal patriarcje Popon (1019-1045).
