Sbroievacje

Ce che vuê al reste dal antîc cjistiel di Sbroievacje e je dome une torate, daspò che l'edifici, pluitost simil a un palaç pai intervents architetonics e lis modifichis patidis tal Votcent cul progjet dal architet Francesco Maria Preti, al fo butât jù tal 1820. Al partignì ae famee omonime fin dai secui XII-XIII, come  che a testifichin lis fonts riferidis ai moments che i patriarcjis a concederin lis investiduris dal cjistiel cui siei feuts e cu lis sôs pertinencis. Tal 1251 al fo assediât des trupis di Alberico di Romano e tal 1511 al fo fiscât une vore di Lenart di Prodolon, nemì dai sovrans di Sbroievacje. Cenglât di un larc fossâl che la sô olme si le viôt ancjemò, l'edifici antîc al è sparît dut e di lui no si sa nuie di sigûr par vie che lis uniche fonts antighis che lu descrivin no àn fondis. La torate che e reste e je cuadrade e e à cinc plans in plui dal plantiere; de presince, su la parêt di soreli jevât, di clanfis dopradis par leâ i mûrs si dedûs che culì in bande al jere un edifici, e compagn  si pues dî pe parêt contrarie. La gleseute dentri de aree perimetrâl e fo dute modificade tal Votcent.