Purcie

Cussì il cont Jaroni di Purcie al piture il cjistiel ereditari inte sô Descrizion de Patrie dal Friûl dal 1567: "Purcie Cjistiel e Vile di là dal Tiliment viers Soreli jevât, lontane di Udin miis 26... Chest al è un Cjistiel grues, tant ben incjasât, e cun aghis, e cetantis Cjasis civîls; a son une vore di Dotôrs e di Nodârs e al è ben popolât; al à biei Palaçs dai Conts; dôs toratis bielonis che une si dîs che e sedi antighe plui di 1600 [agns] une altre gnove, fate sù sul stamp dal tor di Sant Marc in Vignesie, che si pues lâ sù a Cjaval". Lis primis notiziis de fuartece a son dai l5 di Setembar dal 1188, cuant che Guecel I sovran di Prate e avocat de Glesie di Cenede al fo invistît dal patriarcje di Aquilee "cum comitatu" dal feut e dal cjistiel di Purcie. Disvilupât in grandece e magnificence a pâr cul incressi dal podê de cjasade, tribuide ae categorie dai libars e po invistide dal titul comitâl e po dopo dal ranc di princip, vie pai secui il cjistiel al patì cetancj fats di armis e al fo protagonist cui siei sovrans de storie dal Friûl.