Azienda Agricola Principi di Porcia e Brugnera

Te vile antighe di Purcie e tai paîs dulintor si puedin cjatâ ostariis e locâi tant che i ristorants “Al Castello”, “La Casetta” a Palse e “La Ciotola” a Sant Antoni di Purcie. Se si vûl fermâsi ancje la gnot, la citât di Pordenon e ufrìs cetantis soluzions. Si pues rivâ in paîs cul servizi public di corieris, la linie feroviarie e rive invezit dome a Pordenon, che al è lontan sù par jù doi chilometris.
La Aziende “Principi di Porcia e Brugnera” e je une aziende che e à fat la storie agricule de zone: un archivi di esperiencis che al à lis sôs lidrîs tal secul XIII.
E à une superficie di 840 etars, di chescj 150 dedicâts ae viticulture (D.O.C. Gravis dal Friûl e Lison - Pramaiôr), puartade indenant cu lis tecnichis agriculis plui resintis e inovativis cun produzions limitadis par plante. La aziende, no je dome indenant tal cjamp dai mieçs e dai sistemis di coltivazion, ma e à simpri pontât sul svariâ cun atenzion lis produzions par frontâ, cun mancul pericui, lis disfortunis atmosferichis e par garantî un svilup ecocompatibil cul teritori.
Lis cjanivis di Purcie e di Daçan a son indotadis dai sistemis plui modernis par fâ e par conservâ il vin. I neris si morestin e si invecjin in botis di rôl di Sclavanie o di rôl francês, patrimoni di valôr des cjanivis paronâls.