Polcenic

Cuasi dal sigûr il cuel li che al è fat sù il cjistiel al de acet fin de Preistorie a un insediament, doprât daspò ancje dai romans e dai langobarts. Di timps antigons al fo domini de famee omonime, che seont la tradizion e divignive dai conts francês di Blois. Il nucli origjinari dal cjistiel al fo slargjât fin dai prins dal Dusinte, cjapant dentri il borc che de Ete di Mieç si jere cetant disvilupât e che ancje in dì di vuê al à dentri cjasaments di valôr come i palaçs Scolari e Fullini-Zaja, l'ex convent francescan e cualchi torate medievâl des centis. Une part dal complès cjistielan tal Sietcent e fo dal dut trasformade daûr dal progjet di Matteo Lucchesi, cjapant la fisionomie di une vile venite maestose, cuntune scjalinade di 365 scjalins sul rivâl dal cuel che une volte le rindeve ancjemò plui senografiche. Vendût tal 1833, il cjistiel al passà par diviers proprietaris che lu dispuearin di dut chel che si podeve puartâ vie, ancje i cops dal cuviert. Cun dut achel, il complès si presente ancjemò come un manufat di grant interès, logât intun ambient naturâl di bielece straordenarie.