Rocca di Monte Quarin (Cormons)

"Patriarcha sedit in Cormono per annos 200": cussì al declare un document dal an 1159 rimarcant il periodi di storie plui impuartante di Cormons. La indicazion no je però precise par vie che, daûr de opinion di studiôs autorevui, la sede patriarcjâl e restà in chest lûc dome dal 610, an che il patriarcje Zuan al metè in vore il trasferiment, al 735 cuant che e fo puartade a Cividât dal patriarcje Calist.

Al pâr che une prime fortificazion e fos su la mont Cuarine, intes pertinencis di Gurize, indulà che si logà il cjistiel origjinari di Cormons fintremai de Preistorie e che al deventà daspò centri celtic e in fin castrum roman. Tor il secul X, dongje dal cjistiel origjinari al nassè un altri e, da pît de mont, si slargjà la vile, contindude par une vore di timp tra i patriarcjis e i conts di Gurize. Tal secul XII e fo rinfuarcide cun dôs centis, che si cjatin ancjemò rescj; tal 1497 e passà ae Cjase di Austrie e, tal 1511, le concuistarin  lis trupis venezianis che a fiscarin il cjistiel e daspò a tacarin a tornâ a fâ sù la fuartece: i tocs che a restin a permetin di  prossumâ la sô antighe forme circolâr.