Zui

Za popolât dal 500 a.C,  Iulium Carnicum, par vie de sô impuartance strategjiche, al deventà Municipium e cu la sô autonomie aministrative la int e fo notade te Tribus Claudia deventant cussì di dirit romane, cun chê politiche precise di Rome par assimilâ lis popolazions barbaris o dut câs logadis tes zonis di confin dal Imperi. La impuartance dal sît e je cognossude, dal moment che al «vuardeave sei il pas di Mont di Crôs che la val di Incjaroi. La vie consolâr che e passave lenti e colegave l'Imperi Roman cul Noric e dute la zone Nord de Europe».
La sô fondazion e à motivazions di caratar militâr; cul timp il cjamp a trincee si insiorà di elements architetonics fis, tant che il marcjât, lis termis, i templis e lis vilis dai siôrs.
Forsit fiscât une prime volte di Cuâts e Marcomans dal 168 d.C, al fo sdrumât di Alarì tra il 401 e il 408, dai Uns dal 452 e dai Langobarts dal 568; ogni volte si tornave a fâlu e popolâlu, logant ancje un presidi fis.
Vuê i sgjâfs archeologjics a àn metût in lûs il marcjât e altris reperts di ete romane. Par cumò a mancjin invezit testemoneancis di ete medievâl, cuant che a forin probabilmentri fatis sù lis muraiis di difese dal centri abitât.