Sterp

Salacor fat sù prime dal secul XIV, il cjistiel, za infeudât a Detalm e Ascuin di Var, al fo vendût tal Dicembar dal 1335 a Martin Torian. Doi agns dopo, daspò de investidure concedude a Fedegrin  Torian dal patriarcje Bertrant di Saint Geniès, o cjatìn il prin riferiment documentât su la fondazion dal cjistiel. Tai prins dal secul XVI, il cjistiel al fo cedût di Febi e Zuan Torians al cont Albertin di Colorêt che za tal an 1502 al riceveve in chê sede la visite dal çamberlan imperiâl. Il cjistiel di Sterp al fo cjapât a tradiment, cun grues dams, e botinât, ai 30 di Lui dal 1509, cuant che il popul in furie, intiziât di Antoni di Savorgnan, al assaltave il valorôs Albertin te fuartece. Ce che al restà in chê ocasion dal cjistiel, che salacor daspò al patì altris events di vuere, al fo ancje sometût, vie pai secui XVI e XVII, a ricostruzions e a slargjaments di sostance che a trasformarin in mût sensibil la struture fortificade di prime, fin a dâi la fisionomie di cumò.