Ruvigne

Il cjistiel al controlave il vât dal Tiliment dongje de strade vicinâl romane che di Concuardie e lave a Osôf. Nomenât di Venanzi Fortunât intai prins agns dal secul XI, il cjistiel lu à indiment Pauli Diacun in relazion ae ocupazion dal Friûl de bande dai Avars tal 610 e daspò tal 693, an che Ausfrît di Ruvigne al usurpave il ducât a Rodoalt duche dal Friûl. Sot de jurisdizion dai duchis di Carinzie de Cjase di Eppenstein za tal 1122, il cjistiel al passe tal 1218 ai sovrans omonims, infeudâts ancje dal patriarcje di Aquilee. Dopo sei stât plui voltis assediât intes lotis tra il patriarcjât e i duchis di Austrie, tal 1390 il cjistiel al ven cedût di Zuanin di Ruvigne al patriarcje Zuan di Moravie. Passât sot dal domini de Serenissime, al fo concedût ai Purcie. Daspò, il cjistiel al decjadè tant che tal 1567 Jaroni di Purcie lu descrîf cussì: "Ruvigne cjistiel ruvinât; a son però rescj di tantis toratis, cjasutis dai contadins, la glesie e une torate dulà che e je la stanzie dai sovrans". Al fo bandonât par simpri ae fin dal Sietcent.