Prampar

Al è probabil che il cjistiel al sedi nassût par controlâ la strade che e colegave lis impuartantis croseris di Tarcint e di Glemone. Viers la metât dal secul XIII al ven infeudât a une famee che salacor e jere di origjin todescje che di chel moment e cjaparà il gnûf predicât e che e je ancjemò parone. Za inte division dal 1271, il complès al pâr avonde articolât, cun plui zîrs di muris, puartis, toratis, une glesie e une vore di cjasaments. Protagonist di cetancj fats di armis, al patì tal timp distruzions e dams: tra chescj, in particolâr, a forin grâfs il sac e l'incendi dal 1511. Il cjistiel al fo restaurât dome a tacâ dal 1567, pierdint cualchidune des difesis periferichis che in chê volte a jerin aromai vieris. Prime dal taramot dal 1976, il cjistiel al jere stât restaurât di gnûf e si presentave come un dai plui complets esemplis di architeture fortificade dal Friûl medievâl, pûr cjapant dentri une vore di  testemoneancis preziosis de art seguitive. Dal sigûr al è injust che il cjistiel al sedi stât dismenteât: al spiete ancjemò un recupar che aromai no si pues plui rimandâ. E je dute restaurade, invezit, la gleseute cjistielane di Sante Margarite, a pene sot dal cjistiel.