Mueç

Tra il 1084 e il 1085 Cacelin, cont palatin di Carinzie, al regale ducj i siei bens al patriarcje aquileiês, cu la clausule di fâ sù un convent di fraris benedetins sul cuel di Mueç, tal puest dal cjistiel vieri, nassût salacor su rescj romans. La dedicazion e fo ai 8 di Jugn dal 1119 e ai 9 di Avost e fo consacrade la glesie, cu la ufierte di donazions impuartantis subite daspò. Cul cressi dai possediments, ancje la badie, come ogni feudatari, e scugnì contribuî al esercit patriarcjâl cuntun ciert numar di soldâts e e fo cjapade dentri in cetantis vicendis di vuere. Il munistîr, intitulât a Sant Gjal, al vivè un periodi di grant sflandôr massime dal secul XIII al secul XIV. Tal 1773 la jurisdizion civîl, abulide de republiche venite, e fo cuistade des fameis Mangilli e Leoni che a deventarin marchês di Sant Gjal mentri che la jurisdizion eclesiastiche e fo dade al arcivescul di Udin. Al è di grande sugjestion il piçul claustri, tornât a fâ sù dal 1548, e il batisteri cetant antîc, intant che il passât di opare fortificade si pues ancjemò capî dal torat possent, che al da su la valade.