Manzan

I sovrans di Manzan, che tal 1431 a vevin fat cuintri ae la republiche di Vignesie, a rivarin a otignî la sô indulgjence in gracie de intercession de comunitât di Cividât; la Serenissime però e ordenà distès la distruzion dal cjistiel di Manzan, che e fo metude in vore chel stes an. La storie di chest edifici e je leade a chê de potente cjasade ministeriâl dai siei feudataris, protagoniscj inte Storie dal patriarcjât di Aquilee fin dal secul XII. Salacor a jerin di origjin todescje, a vignirin a stâ in Friûl tor il secul XI e a esercitarin dal moment incarghis impuartantis: si sintarin tal parlament furlan e tal consei di Cividât e, tal 1227, Conrât di Manzan al fo elet vicedomin de Glesie di Aquilee. I rescj dal cjistiel antîc si cjatin su la spice di un cuel parsore dal Nadison: une posizion ideâl pal control de strade che e va a Cividât e a Gurize. A soreli a mont, il cjistiel al veve spalts, invezit bande misdì al jere protezût dal teren ruspi che al va jù a straplomp. Dal cjistiel, che al veve une forme circolâr, al reste un mûr maestôs fat di pieris scuadradis.