Luvinà

La cjase fuarte, logade tra lis frazions di Luvinà e di Luserià, e je salacor dal secul XV e e fo dai nobii Pavona, une famee che e vignive de zone di Brescia e che ancjemò al esist il steme di marmul dal Cinccent, murât sore dal puarton di jentrade. Rivade in Friûl za tal Dusinte, seont lis cronachis daûr dal patriarcje di Aquilee Raimont Torian, la cjasade si insedà dal moment inte societât furlane: e fo tribuide ae citadinance nobile di Udin, si imparintà cu lis fameis principâls di chenti e e deventà parone, dutune cui sovrans omonims, di une part dal cjistiel di Buri. E finì cence erêts cu lis fiis di Nicolau, muart tal 1756.

Il complès al è formât di un edifici residenziâl, di une gruesse torate e di altris pertinencis rustichis, e dut al è rifinît di une grande cente, in cualchi trate alte ancjemò cuasi sîs metris. Al plan tiere de torate si pues vualmâ il sufit antîc cun volts a crosere, intant che tai plans parsore si viodin ben i intervents fats tal Sîscent, evidenziâts, par esempli, tal sufit cun grandis suazis di stuc dal ultin plan.