Divilin

La impuartance di chest sît archeologjic si intraven za in ete cetant lontane, di fat «Gjisulf II, tierç  duche langobart dal Friûl, tal 610 al disponeve che si infuarcìs cualchi castrum fra il Lusinç e il Tiliment par fâ cuintri ai Avars e une des fuartecis di prontâ e jere Ibligo, che cualchi storic dal dì di vuê al identifiche cun Divilin». Insediament bielzà in ete romane, tal 1219 e tal 1278 il lûc al è  nomenât intune stipule di aleancis e intune declarazion fate dal gastalt de Cjargne rivuart ae sô buine opare tal meti in vore la justizie. Cun di plui, al fo possediment patriarcjâl e la Glesie aquileiese lu tignì, lu mantignì e lu difindè in diviersis ocasions, ancje se al pâr che tal 1353, par ordin dal stes Patriarcje, lis muris dal cjistiel a sedin stadis dutis sdrumadis. I siei possediments a restarin invariâts, e tal 1389, tal 1402 e tal 1441 a son notiziis di gnovis investiduris di chest feut. In dì di vuê a restin pocjis olmis de fuartece antighe.