For Disore e For Disot

La storie di For Disore e je leade a strent cun chê di For Disot. Un prin riferiment ae localitât, popolade ancjemò in ete romane, al ven di un at di donazion: tal 778 Massel, duche dal Friûl par cont di Carli il Grant, al regalave ae Badie di Siest lis vilis dai Fors cun dutis lis pertinencis. Tal 967 l'imperadôr Oton i dave in benefici al patriarcje Rodoalt ducj i feuts e ducj i bens che il langobart Rodoalt, chel che al veve copât il patriarcje Leon, al veve; fra chei bens al pâr che a fossin chei di Anon, abât di Siest, e il cjistiel clamât di For. Di chest cjistiel si torne a fevelâ tal 1255 par vie di une cierte donazion fate a pro de Glesie di Aquilee, e tal 1300 si nomene il cjistiel di For come feut di abitance destinât dal Patriarcje a un ciert Francesc di Lenart di Soclêf. Tal 1326 si nomenin ancjemò une volte i cjistiei di For Disore e di For Disot par vie che a forin vendûts di Vualtîr di Nonte a Etor Savorgnan, che di culì al tacà il so predomini su cheste part de alte val dal Tiliment.

Dal prin cjistiel, chel di For Disore, individuât tal borc Tintait, in dì di vuê no podìn purtrop amirâ nuie, fale un fossâl che al cengle il cuel parsore, forsi un antîc val di difese cjistielane. Ancje culì, inviant une acurade campagne di sgjâfs, si podaressin sapontâ lis intuizions za pandudis di cualchi studiôs in mert a chest lûc.

Dal cjistiel di For Disot, logât inte localitât di Pra di Got a 907 metris di cuote, si viôt vuê dome cualchi rest de muradure, salacor de base dal torat maiôr. Al è di just riferî une ultime note storiche: di fat, daûr Miotti, «tacant dal secul X e fin al secul XIV si fevele di un sôl cjistiel di For. I documents no precisin cuâl dai doi che al fos, e nancje i nestris sorelûcs, mancjant lis ricercjis a mieç dai sgjâfs, no àn podût stabilîlu. E no si pues escludi che magari si fasi riferiment ae plui antighe fuartece di Sàcquidic».