Scjaramont

Ce che si viôt vuê di Scjaramont al è forsi dome une part dai trê fuartins che une volte a forin fats sù su la prominence che e parone di une bande l'Arzin e di chê altre une part dal cors dal Tiliment, e che i disin ancje Çuc Scjaramont. Di culì al ven il non talian di Castelraimondo, forsi ancje par memoreâ il patriarcje Raimont Torian che lu ristruturà. Tal 1279, in gracie di un at di compravendite, Varient di Flavuigne al deventà paron di un mâs e di un bearç dai sovrans di Forgjarie. Intal stes an e tacà la costruzion di Scjaramont.

Naturâl che cheste vicinance dificile cul cjistiel di Flavuigne e produsès cetancj ats di ostilitât, come tal 1288, tal 1290 e vie indenant.

Disfat e brusât tal 1300, a tornarin a stâ tal cjistiel dal sigûr dome tal 1325; tal 1335 al fo brusât une altre volte di Etor Savorgnan, che al procedeve par cont di Udin. Tal 1344, cuntun ingjan al cirì di gnûf di imparonâsi di Scjaramont, che intant al jere deventât une cove di int "pierdude" che si dedicave aes robariis dai marcjadants che a passavin pes trê stradis controladis dal cjistiel: chê dal Arzin che e vignive jù de Cjargne, chê che di Glemone e coreve ad ôr dal Tiliment e la Pedemontane ocidentâl.

Ai 22 di Jugn dal 1348 il Parlament de Patrie, daûr propueste dal patriarcje Bertrant, al disponeve che in chel lûc no si ves plui di tornâ a fâ sù ni che al podès plui esisti un cjistiel, stant che al jere deventât une «spelunca latronum».

A vuê, in gracie di sgjâfs scrupulôs, insom dal cuel di Çuc Scjaramont, in plui dai reperts di ete medievâl dal stes cjistiel, a son saltadis fûr fondis di abitazions preistorichis, segnâi di antighis ativitâts metalurgjichis, bocons di mûrs romans, ma ancje fiubis, rincjins, sclesis di vâs e vie indenant, a conferme che in chest puest par miârs di agns a forin insediaments umans.