Casa Fortificata del Bergum (Remanzacco)

Al è probabil che il sît dulà che e je la cjase fuarte dal Bergum al sedi chel istès che al è nomenât intun document dal 1275 e clamât "Bergogna". Logât inte largje plane tra Remanzâs e Cjampei, za di une epoche imprecise al fo dai Cjalderins e di lôr, tal 1770, al passà ai Serafins. In plui des partignincis rustichis, il complès al cjape dentri une torate medievâl, cun elegantis capis di cuet insom, e l’edifici paronâl, cul sugjestîf puarti a volts tal mieç; a chê i corispuint tal prin plan la sale  insiorade dai rescj dai afrescs dal Cuatricent, che tra chei a ‘nd è un che al mostre il leon di Sant Marc. Dut al è cjapât dentri intune spaltade di mûr, che une volte e jere plui alte e slargjade. Cualchi parament dai mûrs dentri dal edifici principâl al sugjerìs di datâ almancul il prin nucli ae tarde antighitât, mentri che impuartants lavôrs di restaurazion a forin metûts in vore vadì tal 1500, cuant che su la façade e fo murade la elegante steme di piere, tignude sù di doi agnui, che e à segnade cheste date.