Casa Fortificata La Brunelde (Fagagna)

Il sît, che si cjate za tal 1208 intun inventari dai bens dai di Arcjan, al jere za abitât in epoche romane. Di fat, la domus magna tricanea al è pussibil che e fos fate sù sui rescj di une vile rustiche che e jere dongje de strade che di Concuardie e rive ad Silanos, e e jere componude di un grant edifici, cuntune torate tal cjanton nord-ovest, cun in bande cjasaments plui bas, protezût di dôs spaltadis e, almancul a soreli bonât, di un ampli fossâl, jemplât a pene cualchi desene di agns indaûr e che ancjemò al à lassade une lizere depression dal teren. Tacant de fin dal Cuatricent e massime tai agns 1517-18, la cjase fuarte e fo dute trasformade par man di Zuan Nicolau di Arcjan che al slargjà lis alis laterâls, cjapant dentri la torate centrâl, e al fasè sù (justant un piçul cuarp di vuardie) la capele dedicade a Sant Nicolau. E je di interès particolâr la organizazion "moderne" dal apartament al plan tiere, salacor impostât daûr dai sugjeriments di Riçart di Arcjan, segretari a Rome dal gardenâl Zeno, struturât ator de sale centrâl e che al cjape dentri ancje il piçul studi e la cjaminade.