Bielvedê di Marsuris

Tal 1467 Jaroni di Partistagn al decît di fâ sù une residence di campagne, sielzint il biel sît cul non tant clâr di Bielvedê, dongje de Tor. La cjase fuarte si presente inmò, cundut che a son stâts restaurs resints, cuntun atrat particolâr, che al fâs respirâ ad implen il concet di residence di plasê, di "lûc des deliziis"; chest massime par vie de biele trifore centrâl cun arcs polilobâts di piere e pai graciôs  particolârs di cuet des barconetis dal solâr (ancje chês cul arc polilobât) e de jentrade, cun parsore la steme dal Cuatricent di piere cul leon rampant dai sovrans di Partistagn, ram dai sovrans di Cucagne. Di cuintri de concezion auliche de façade denant, chê daûr si presente inmò disfurnide, cun pôcs barcons e cun cualchi buchere tal piçul fabricât laterâl, che forsit al jere un cuarp di vuardie. Il palaçot di Bielvedê al è ce che al reste di dut il complès signorîl che une volte al cjapave dentri une spaltade di mûr, cualchi rustic e la capele indulà che al volè sei soterât l’ultin cont di Partistagn, Zuan Josef, muart tal 1801.