Solomberc

Tal 1196, il vescul di Concuardie Romul al dave in man a Almerì dai sovrans di Cjistielgnûf la ultimazion dal cjistiel di Sonemberg (Solomberc), investintlu di metât dal feut, ma tal secul daspò a risultin feudataris che salacor a vignivin de Carinzie che a cuistarin di chel sît il lôr predicât. Po dopo al fo dai siôrs di Flavuigne e di chescj, tal 1384, al passà par simpri ai siôrs di Spilimberc. Il complès al pant ad implen l’abandon di secui ma al conserve ancjemò un so atrat particolâr, incressût de posizion dominante sul çuc dal cuel e dal fat di jessi logât intun contest di paisaç di grant respîr, leantsi ben ae etimologjie dal non che al vûl dî "cjistiel lusint", propit parcè che al è in batude di soreli di buinore fin sere. In plui di bocons de cente di difese, cun paraments di mûr fats cun pieris scuadradis cun cure e cometudis tra di lôr, si pues ancjemò viodi un toc de torate, caraterizade dal spazi interni une vore strent ma cun muris gruessis cirche un metri e mieç.