Rivarote

In dì di vuê dal antîc sît cjistielan di Rivarote e reste dome une cjase fortificade indotade di une torate circolâr. O vin di fâ un sfuarç di imagjinazion par vualmâ chê che tal 888 e jere clamade «Curtis de Ripafracta» dal imperadôr Berengari I, te conferme di cualchi donazion al munistîr di Siest. Nomenât tant che curtis, salacor chest lûc al fo «un complès di costruzions destinadis a magazens pes provisions, e di abitazions logadis ator ator di un palaç signorîl». Dut câs, za tal secul IX e je testemoneade la esistence di une fuartece logade a presidi di cheste part di teritori, che e veve di vê une cierte impuartance se «za Carli il Grant, tal 781, confermant  ae badie di Siest i bens proferîts dal re langobart Adalgjîs, si riferìs ae cort di Rivarote, di proprietât reâl». Lûc di pertinence dai vescui di Concuardie, al fo infeudât viers la metât dal Dusinte ai sovrans di Prate, che lu tignirin midiant dai lôr gastalts o cjapitanis.