Pinçan

I sovrans di Pinçan, parincj di chei di Ruvigne, a son nomenâts pe prime volte tal secul XII, salacor vassai dai duchis di Carinzie. Cheste cjasade e tignì la fuartece fin tal 1344, cuant che il patriarcje Bertrant di Saint Geniès ur e gjavà par colpe di contrascj internis che a causionarin fats di sanc grâfs. Daspò cualchi an, tal 1352 il feut al fo cedût ai Savorgnan che lu tignirin fin che e colà la republiche venite tal 1797. Il complès fortificât si slargjave suntune grande aree protezude di plui centis, bastions e toratis, e al jere, ancje par vie de posizion difindude in mût naturâl dal cret e dal Tiliment parsot, un lûc cuasi impussibil di cjapâ. Il fat che al sedi stât bandonât par secui e i ultins grâfs events sismics a àn cuasi dal dut scancelât lis olmis di chel complès maestôs; tal mieç dal boscam, ca e là, si vualmin rescj di muris e pocjis ruvinis dai tancj edificis cjapâts dentri intes spaltadis difensivis. Al è tant biel il paisaç naturâl dulintor, che si pues gjoldi passant fûr pe strade cjistielane antighe.