Cjanive

Za rezince patriarcjâl, salacor il cjistiel al nassè dongje di une torate di avistament romane e, in gracie de sô posizion rilevante dal pont di viste strategjic, al fo par une vore di secui infeudât a diviers esponents de aristocrazie furlane: Zuan di Çucule Spilimberc tal 1297, Fidrì di Savorgnan tal 1337 o ancjemò Zuan di Top tal 1356.

Documentât fin dal an 1034 tant che possediment de Glesie di Aquilee, al fo teatri di cetancj scuintris tra lis trupis patriarcjâls e chês trevisanis, passant mo sot dal control dai Patriarcjis mo sot di chel dai da Camino. Tal 1385 il cjistiel al fo ocupât des trupis dai Carraresi, sorestants di Padue. Tornât tes mans de Glesie di Aquilee, al fo cjapât des trupis venezianis tal 1420. I rescj dal cjistiel antîc, logât insom di un cret, a son costituîts vuê des fondis di cualchi murace di difese e di ce che al reste di cualchi torate. Dentri de cengle dal cjistiel si cjate la gleseute di Sante Luzie de fin dal secul XVI e il cjampanili fat sù sore di une torate antighe.