Grau

Sît impuartant fin dai timps de antighe Rome Imperiâl, il "castrum gradense" al nassè ae bocje dal flum che i disevin Natisse, che in gracie di chel si podeve lâ sù fintremai al Puart di Aquilee. Lûc  strategjic pe difese de stesse Aquilee dal II secul d. di C., tra il 402 e il 408 d.C. al dè acet ai aquileiês che a scjampavin, imprin, des bandassis visigotis di Alarì, daspò, tal 452 d. di C., di Atile e dai siei Uns, e po dopo, tal 568, par sghindâ i sacs langobarts. Ancje par chescj motîfs, stant che a mancjavin sigurece e stabilitât, la sede dal Patriarcjât e fo trasferide di Aquilee a Grau, tacant dal patriarcje Pauli (567-569). Daspò dal schisme dai Trê Cjapitui, a forin elets doi Patriarcjis, un cun sede a Aquilee e un a Grau. E tacà cussì une cuistion secolâr pe supremazie eclesiastiche sui teritoris dal Friûl. Chest fat al vuastà fin tes fondis i rapuarts fintremai in chê volte pacifics fra lis dôs citâts: di fat al fo clâr dal moment che no podevin esisti insiemit in serenitât dôs sedis patriarcjâls. Tal 993, rinfuarcide intes sôs difesis par opare dal dôs Urseul II, Grau e fo concuistade dal patriarcje Popon, che dut câs nol rivà a mantignîle. Tal 1027 il Pape al stabilì in mût definitîf il primât di Aquilee sore Grau e duncje sore la provincie venite. Tal 1451, cu la bole "Regis aeterni", il pontefiç Nicolau V al deludè par simpri lis bramis dai gradoans su la sede patriarcjâl, che e fo trasferide a Vignesie. Ridusude dome a plêf, e patì sacs dai inglês tal 1810, dai Francês tal 1812 e e colà in fin sot il domini austriac tal 1815, tacantsi ae Italie dome tal 1915.

Si pues preseâ ben pôc de fuartece antighe: si viodin un toc de cente fortificade, cuntune soreelevazion di ete resinte, une cjasute  cun barbecjans fate sù su la cente medievâl, e la torate antighe, cumò ritocjade. Dal fuartin dal Cinccent, che al jere ancjemò sul tacâ dal secul, no reste plui invezit nissune olme.