Puartis

In localitât Puartis, cirche un chilometri e mieç a nord di Vençon, des dôs bandis de superstrade par Cjargne, si cjatin ancjemò doi bastions murâts par difindi la strete fra il Tiliment e lis cuestis dal Plauris, sot de glesie di Sant Bartolomeu. A son lis parts che a restin di un antîc sisteme difensîf che al sierave e al controlave cun sigurece la strade pontebane, che une volte e menave tal Noric, dividintsi a Cjargne di une bande viers il Cjanâl dal Fier e Tarvis e di chê altre viers Tumieç, Zui e la Cjargne. Forsi tacadis a fâ sù tal secul XV, chestis dôs struturis a son vuê isoladis intun contest che dut câs al viôt sparniçâts in chest teritori altris reperts muraris antîcs, come il Rivelin Venezian logât sul cuel de Nâf, datât 1617; cualchi bocon di mûr a Cjamp Cjistiel; la fuartece di Satimberc, logade suntun cret, parsore l’abitât di Puartis, dongje dal Plauris; la fuartece di Pragjel, a un chilometri cirche a est di Vençon; i Spalts di Sante Catarine, dilunc il cuel omonim, dongje de glesie di Sante Catarine, pôc parsore Vençon.