La Scluse

Di cheste fuartece vuê e reste dome la memorie storiche, par vie che nol vanze nuie des muris antighis. Dut câs le vin metude in cheste publicazion parcè che tal passât e je stade une opare difensive di grande impuartance, che e vuardeave la vie che e leve viers Nord, intun pont dulà che la Fele si incanalave intune strete tra lis monts ator ator. Par chel che al inten lis notiziis documentadis, za tal 1136 chest lûc al jere clamât Scluse: «...si scrupule che tal 837 fra lis vals alpinis postadis a difindi l'imperadôr Lotari par aviersâ chês che al crodeve che a fossin lis mossis dal pari cuintri di lui, e fos ancje la scluse dal Cjanâl dal Fier». La Scluse e je nomenade tal 1150 cuant che il patriarcje Pelegrin al proferì la esenzion dai dazis pal passaç di cheste fuartece al cjapitul di Gurk e ae Badie di Mueç. Lûc di transit necessari, in curt al fo in concorince cun Vençon e cun Glemone, e simpri sot di chest pont di viste, il patriarcje Bertrant, che nol voleve rinunciâ a di chest cjistiel, tal 1343 «al disponeve une grande ristruturazion difensive dal fuart, che al jere  considerât a reson di impuartance strategjiche primarie pal teritori Aquileiês». Concuistât dal duche di Austrie tal  1359, ocupât dai Venezians tal 1420 e des trupis ongjaresis tal 1422, tal 1509 al fo cjapât dentri in fats di armis impuartants tra la Republiche di Vignesie e l'imperadôr Massimilian di Asburc. «Tal 1606 Vignesie e proviodè a infuarcî lis difesis [...], tal 1826 il guvier austriac al deve ordin di butâ jù il fuart e tal 1833 la demolizion e fo puartade insom par slargjâ la strade pontebane».