Abitâ

La miôr forme par doprâ e duncje conservâ un cjistiel, e je chê di sielzilu tant che residence. Fale che la iniziative no si trasformi intune ristruturazion cun division dai spazis internis e duncje e puarti a un grant sviersament de struture e des carateristichis dal monument, cheste e je la miôr forme di rivitalizazion di un complès edilizi che al à simpri dât acet, oltri che a funzions militârs, aministrativis, produtivis, ancje a chês di residence pal Siôr feudâl e pe sô famee, pai oms di armis e pal personâl di servizi cu lis lôr fameis.

Jessi a stâ intun cjistiel e je simpri une esperience inmagante e sugjestive, che e compuarte sedi il discomut di spazis amplis e di aspiets distributîfs une vore diferents di chei di une abitazion moderne, sedi ancje lis sodisfazions che a vegnin dal sei consapevui di jessi a stâ intun complès dulà che la storie no si è mai fermade, che al à viodût a sotentrâsi gjenerazions e dadis di vite, buinis e tristis, che al à segnât moments impuartants inte storie di un teritori e di une comunitât.

Se si decît di lâ a stâ intun cjistiel, si à tignîlu cont par chel che al è. Di sigûr si scuegnin inserî i elements tecnologjics che a coventin pe vite di vuê (implants idrics, termics, telematics, di sigurece), ma dut tal rispiet totâl des antighis muris e struturis, che a àn di sei tratadis cun cure e atenzion, rindintsi cont che a son valôrs impuartants, segns sugjestîfs dal lavôr, de vite e de esperience di tancj altris oms e feminis che in chei ambients a àn vivût, lavorât, amât, patît, e massime che cu la lôr ativitât e volontât a àn prontât un complès architetonic che al à di sei consegnât intat aes gjenerazions che a vignaran.

Al è ben comprâ un cjistiel o tornâ a doprâlu tant che abitazion, ma cul rispiet plen des sôs carateristichis, cence sfuarçâlis e pleâlis a necessitâts che no sedin chês de sô conservazion e trasmission al futûr.